U-17 karla | 9 marka sigur á Króatíu

U-17 ára landslið karla sigraði Króata örugglega 35-26 í fyrsta leik sínum á Ólympíuhátíð Evrópuæskunnar.

Leikurinn fór rólega af stað og var nokkuð jafn til að byrja með. Um lok fyrri hálfleiks small íslenska vörnin hins vegar og Króatar áttu engin svör. Íslensku strákarnir komust fyrst yfir þegar 4 mínútur voru eftir af háfleiknum og gáfu þá í. Sterk vörn skilaði mörgum hraðaupphlaupum og þegar gengið var til búningsherbergja voru strákarnir yfir 19-14.

Strákarnir mættu jafn ákveðnir til leiks í síðari hálfleik og tóku leikinn föstum tökum. Eftir 10 mínútna leik komst íslenska liðið í 11 marka forystu. Strákarnir gáfu ekkert eftir og lönduðu að lokum 9 marka sigri.

Mörk Íslands í dag skoruðu: Eiður Rafn Valsson 9, Gísli Rúnar Jóhannsson 8, Róbert Dagur Davíðsson 5, Andri Clausen 4, Daníel Stefán Reynisson og Ívar Bessi Viðarsson 3, Arnþór Sævarsson 2 og Örn Alexandersson 1. Ari Dignus Maríuson átti stórleik í markinu og varði 12 bolta.

Á morgun leika strákarnir við Danmörku kl. 14:30 að íslenskum tíma.