Handknattleikskona ársins:
Handknattleikskona ársins er Íris Björk Símonardóttir, markvörður Íslands- og bikarmeistara Vals. Íris Björk gekk til liðs við Val sumarið 2018 og var einn burðarása Hlíðarendaliðsins sem varð þrefaldur meistari á síðasta keppnistímabili. Enda var keppnistímabilið einstaklega glæsilegt hjá Íris sem uppskar laun erfiðis síns í mótslok. Hún valin besti leikmaður Olís-deildar kvenna, einnig besti markvörður deildarinnar auk þess sem henni hlotnaðist Sigríðar-bikarinn sem mikilvægasti leikmaður Olís-deildarinnar. Síðast en ekki síst var Íris Björk valinn mikilvægasti leikmaður úrslitakeppni Olís-deildarinnar.
Íris Björk hefur leikið 71 A-landsleik og skorað í þeim fjögur mörk. Fyrsti leikurinn var gegn Færeyjum á Eiði 21. maí 2005. Hún var annar tveggja markvarða íslenska kvennalandsliðsins þegar það tók fyrst þátt í lokakeppni stórmóts á EM í Danmörku fyrir níu árum. Eftir nokkurt hlé frá landsliðinu gaf Íris Björk kost á sér í landsliðið á nýjan leik í haust þegar undankeppni EM hófst. Stórbrotin frammistaða hennar í leiknum gegn þáverandi heimsmeisturum Frakka á Ásvöllum í undankeppni EM í lok september vakti verðskuldaða athygli út fyrir landssteinana.
Íris Björk er 32 ára gömul og tveggja barna móðir. Hún hefur ekki látið barneignir slá sig út af laginu heldur mætt sterkari en áður til leiks að þeim loknum. Íris Björk lék með Gróttu frá barnæsku og upp í meistaraflokk. Árið 2009 gekk hún til liðs við Fram hvar hún lék ársins 2012 og varð bikarmeistari með Safamýrarliðinu 2010 og 2011. Hún skipti yfir til uppeldisfélags síns, Gróttu, 2012 og varð Íslands- og bikarmeistari með liðinu 2015 og Íslandsmeistari á ný árið eftir. Íris Björk söðlaði um sumarið 2018 og gerðist liðsmaður Vals.
Íris Björk er fyrirmynd fyrir yngri jafnt sem eldri handknattleiksiðkendur, hvort heldur utan vallar eða innan.
Handknattleiksmaður ársins:
Handknattleikskarl ársins 2019 er Aron Pálmarsson, vinstri skytta og leikstjórnandi spænska meistaraliðsins Barcelona.
Aron varð þrefaldur meistari á Spáni á síðasta keppnistímabili með Barcelona auk þess sem liðið komst í „final four“ úrslitahelgi Meistaradeildar Evrópu í vor. Aron hefur blómstrað með liðinu á yfirstandandi leiktíð þar sem liðið ber höfuð og herðar yfir önnur í heimalandinu auk þess sem það hefur verið eitt það sigursælasta í Meistaradeild Evrópu fram til þess á keppnistímabilinu. Til viðbótar hefur Aron um árabil verið lykilmaður íslenska landsliðsins.
Aron er 29 ára gamall og fékk sitt handknattleiksuppeldi hjá FH. Hann lék upp yngri flokka félagsins og var í fyrsta sinn í meistaraflokki í mars 2006, þá tæplega 16 ára gamall. Þremur árum síðar gekk Aron til liðs við stórliðið THW Kiel í Þýskalandi og var á mála hjá liðinu í burðarhlutverki í sex ár. Eftir árin hjá Kiel gekk hann til liðs við ungverska meistaraliðið Veszprém. Árið 2017 gerðist Aron leikmaður Katalóníurisans Barcelona.
Aron hefur verið afar sigursæll á sínum ferli og unnið flesta þá titla sem lið hans hafa leikið um. Hann var valinn mikilvægasti leikmaður „final four“ úrslitahelgar Meistaradeildar Evrópu vorin 2014 og 2016 og var í sigurliði Meistaradeildar 2010 og 2012. Einnig hefur Aron leikið nokkrum sinnum til úrslita. Hann var í bronsliði Íslands á EM 2010 og er mörgum eflaust í fersku minni stórleikur Arons í sigurleik á Dönum á mótinu. Aron var kjörinn Íþróttamaður ársins af Samtökum íþróttafréttamanna 2012.
Hinn 29. október 2008 lék Aron sinn fyrsta A-landsleik á móti Belgíu í Laugardalshöll. Hann hefur tekið þátt í öllum stórmótum landsliðsins frá og með EM 2010 ef frá er talið HM 2017 og á að baki 141 landsleik sem hann hefur skorað í 553 mörk.
Sem atvinnumaður í handknattleik í áratug hefu Aron verið einstök fyrirmynd ungra handknattleikiðkenda, bæði hér á landi og erlendis.