U-19 karla | Sigur í fyrsta leik á Opna Evrópumótinu

U-19 ára landslið karla mætti Egyptum í fyrsta leik á Opna Evrópumótinu nú í morgun, eins og svo oft áður tefla Egyptar fram stóru og sterku liði og því var von á hörkuleik.

Það var íslenska liðið sem hafði frumkvæðið fyrstu mínúturnar og hafði 1-2 marka forystu en eftir því sem leið á hálfleikinn styrktist varnarleikur Egypta og smám saman náðu þeir yfirhöndinni í leiknum. Þegar liðin gengu til búningsklefa var staðan 11-12 Egyptum í vil.

Þjálfarateymi íslenska liðsins skipti um varnarleik í hálfleik og fljótlega fór að koma hik á sóknarleik andstæðinganna sem skilaði sér í nokkrum góðum hraðarupphlaupum og uppúr miðjum síðari hálfleik var íslenska liðið 2-3 mörkum yfir. Það forskot hélst alveg fram á lokamínúturnar þegar Egyptar fóru að spila maður á mann varnarleik og þegar 20 sekúndur voru eftir minnkuðu þeir muninn í 1 mark. Íslenska liðið missti boltann þegar 4 sekúndur lifðu leiks en til allrar hamingju var það ekki nægur tími fyrir Egypta og strákarnir okkar fögnuðu sætum sigri, 23-22.

Markarskorarar Íslands:

Dagur Árni Heimisson 6

Ágúst Guðmundsson 3

Bessi Teitsson 3

Elís Þór Aðalsteinsson 2

Egill Jónsson 2

Haukur Guðmundsson 2

Garðar Ingi Sindrason 1

Daníel Montoro 1

Andri Erlingsson 1

Dagur Leó Fannarsson 1

Jens Bragi Bergþórsson 1