Íslenska kvennalandsliðið leikur alla leiki sína í riðlakeppni EM 2026 í Oradea í Rúmeníu. Borgin er um 200.000 manna og stendur í norðvesturhluta landsins, rétt við landamærin að Ungverjalandi.
Oradea er ein fallegasta borg Rúmeníu og þekkt fyrir einstakan art nouveau byggingarstíl, heitar laugar og líflegt menningarlíf. Meðal helstu kennileita borgarinnar eru Unirii-torgið, Tunglkirkjan og Oradea-virkið.
Saga borgarinnar er samofin sögu Ungverjalands. Borgin, sem á ungversku heitir Nagyvárad, tilheyrði Ungverjalandi fram til ársins 1920 og þar býr enn stór ungverskur minnihluti. Búast má við mikilli stemningu þegar Ísland mætir Ungverjalandi í lokaleik riðilsins.
Oradea Arena
Leikið verður í Oradea Arena, glæsilegri fjölnotahöll sem var tekin í notkun árið 2022. Höllin tekur um 5.300 áhorfendur og stendur í austurhluta borgarinnar, við íþróttasvæði hennar og ána Crișul Repede.
Leikir Íslands í Oradea (íslenskur tími)
Fim. 3. des. kl. 16:30 · Slóvenía – Ísland
Lau. 5. des. kl. 16:30 · Svartfjallaland – Ísland
Mán. 7. des. kl. 19:00 · Ísland – Ungverjaland
Tímamunurinn er tvær klukkustundir og leikirnir hefjast kl. 18:30 og 21:00 að staðartíma. Alþjóðaflugvöllur er í borginni.
Allir leikir Íslands verða í beinni útsendingu á RÚV.