Undanúrslit kvenna I Eyjakonur í úrslit eftir hádramatík í Eyjum

ÍBV vann Hauka 36-31 í oddaleik liðanna í gærkvöldi í öðrum tvíframlengdum leik einvígisins. Jafnt var á öllum tölum eftir 60 mínútur og sömuleiðis eftir 70 mínútur. Eyjakonur voru að lokum sterkari þegar á reyndi, voru yfir þegar 80 mínútur voru liðnar og eru því komnar í úrslitaeinvígið gegn Valskonum.

Sú staðreynd að tveir leikir af fimm hafi unnist í tvíframlengdum leik sýnir hversu jöfn liðin eru. Spennan fyrir þessum leik var ansi mikil enda sýndi það sig í húsinu að rafmagnað andrúmsloft var frá upphafi til enda, stúkan troðfull og stemningin eftir því. Eftir venjulegan leiktíma var staðan 27-27 og ljóst að yrði að framlengja í það minnsta einu sinni. Stuðningsfólk liðanna var að endurupplifa augnablikið frá leik þrjú sem fór einmitt líka í tvær framlengingar. 

Gestirnir náðu tveggja marka forystu í upphafi fyrri framlengingar áður en 3 mörk í röð komu frá heimakonum. Haukar jöfnuðu svo í 30-30 þegar um 2 mínútur voru eftir af framlengingunni en engin mörk voru skoruð til viðbótar og önnur framlenging orðin að veruleika. Þar var lið ÍBV sterkari aðilinn, skoruðu fyrstu 2 mörkin áður en Haukar svöruðu með einu marki en síðustu 4 mörk leiksins voru öll heimakvenna og 36-31 sigur því staðfestur og farseðillinn í úrslitin sömuleiðis. 

Hreint út sagt magnað einvígi að baki sem liðin geta verið stolt af til að auglýsa okkar frábæru íþrótt. Tvö frábær lið með nokkrar landsliðskonur innanborðs og endurkoma Hrafnhildar Hönnu í Eyjaliðið var enn meira krydd í tilveru þessa leiks. En eins og áður segir er það lið ÍBV sem stóð uppi sem sigurvegari og mætir Val í úrslitaeinvígi um sjálfan Íslandsmeistaratitilinn í kvennaflokki keppnistímabilið 2025-2026. 

Valskonur hafa fengið ágæta hvíld eftir sitt undanúrslitaeinvígi gegn Fram sem kláraðist fyrir viku síðan. Þær mæta því klárar í slaginn gegn Eyjakonum næstkomandi laugardag, 2.maí, en þá hefst úrslitaeinvígið í N1 höllinni að Hlíðarenda. Valskonur eiga heimaleikjarétt alla úrslitakeppnina þar sem þær eru deildarmeistarar en einmitt þess vegna er deildarmeistaratitillinn mikilvægur því liðin vilja eiga fyrsta leik á heimavelli en umfram allt ef einvígið fer í oddaleik þá er það lið sem endaði ofar í töflunni að spila á heimavelli þegar allt er undir. Við hlökkum til veislunnar sem framundan er í úrslitunum.

Leikdagar í úrslitaeinvíginu

Laug 2.maí í N1 höllinni
Þrið 5.maí í Íþróttamiðstöð Vestmannaeyja
Laug 9.maí í N1 höllinni
Þrið 12.maí í Íþróttamiðstöð Vestmannaeya (ef þarf)
Mán 18.maí í N1 höllinni (ef þarf)

Miðasala á allt úrslitaeinvígið fer fram á stubb.is eða í Stubbur appinu. 

Leikurinn á laugardag er sýndur í opinni dagskrá Sjónvarps Símans þar sem lýsendur og sérfræðingar eru tilbúnir að gefa allt í þetta eins og leikmenn og þjálfarar liðanna.  

#hjartaðíboltanum