Þórir Hergeirsson ráðinn afreksstjóri HSÍ

Handknattleikssamband Íslands í samstarfi við Afreksmiðastöð Íslands hefur ráðið Þóri Hergeirsson í starf afreksstjóra sambandsins.

Þetta eru stór og ánægjuleg tíðindi fyrir HSÍ og íslenskan handbolta. Við fögnum ráðningunni einstaklega mikið og teljum að reynsla, þekking og fagleg sýn Þóris verði mikil lyftistöng fyrir íslenskan handbolta og íþróttastarf á Íslandi almennt.

Þórir þarf vart að kynna fyrir íslensku íþróttafólki. Hann er einn sigursælasti landsliðsþjálfari handboltasögunnar og hefur áratugum saman starfað í fremstu röð alþjóðlegs handbolta. Hann stýrði norska kvennalandsliðinu frá 2009 til 2024, en hafði áður verið aðstoðarþjálfari liðsins frá árinu 2001.

Á þeim tíma náði liðið einstökum árangri undir hans stjórn. Noregur varð meðal annars tvívegis Ólympíumeistari, þrívegis heimsmeistari og sex sinnum Evrópumeistari. Þá vann liðið til fjölda annarra verðlauna á stórmótum og skipaði sér í fremstu röð heims í áraraðir.

Það er mikill fengur fyrir HSÍ að fá einstakling með þessa reynslu og þekkingu til að leiða afreksstarf sambandsins, samhliða Jóni Gunnlaugi Viggóssyni, Íþróttastjóra HSÍ. Við sjáum mikil tækifæri í því að nýta þekkingu Þóris til að efla umgjörð, fagmennsku og þróun afreksstarfsins, allt frá yngri landsliðum upp í A-landslið karla og kvenna í samvinnu við Íþróttastjóra HSÍ.

Við hlökkum mikið til samstarfsins, að læra af Þóri, nýta reynslu hans og þekkingu og vinna saman að því að færa efla íslenskan handbolta.

Velkominn til starfa, Þórir!

Þórir Hergeirsson ráðinn afreksstjóri HSÍ

Nýjustu fréttir